沉寂一時嘅假冒香港郵政騙案又上線了!騙徒假冒香港郵政發放SMS及電郵,聲稱包裹未能付運,要求按連結進入網站以信用卡繳付 $10至$50 不等郵費。
當你進入呢個假網站留低信用卡資料,你估只會碌你幾十蚊咁簡單?
千祈唔好以為報咗警就一定可以向銀行claim 番損失,其實每間銀行嘅理賠標準都唔一樣。如果證實到客戶有疏忽,銀行分分鐘唔會賠錢。
唔想上當嘅話,收到不明短訊或電郵一定要留神。記住以下三大破綻:
假SMS – 附上釣魚網站連結
假電郵 – 電郵內容嘅文法唔通順
假網站 – 不能轉換語言,假信用咭資料都可能過版
資料來源:香港警務處網絡安全及科技罪案調查科