監管懶懶閒 奸商笑開顏
(太陽報) 2009年12月23日
本港電訊市場近排醜聞特別多，早幾日先至有資訊公司被指濫發收費短訊呃錢，尋日消委會又踢爆，有奸商以不良手法推銷電視機頂盒，價錢高出市價三倍咁多。
消委會舊年收到百幾單投訴，但係今年首十一個月就收到三百幾單。話時話，呢班奸商真係夠晒無良，專門搵公公婆婆老襯。佢哋派人假扮房屋署、電視台或者業主 立案法團嘅人，趁屋主返工時間上門，話大廈已開始裝高清電視，如果唔買機頂盒，以後就冇電視節目睇。老人家得閒無事都靠睇電視過日辰，點可以冇電視睇呀， 咪拿拿聲攞錢出嚟買機頂盒囉。有長者想打電話問吓屋企人，騙徒即刻按住個電話：「千祈唔好，一打電話就會產生輻射，影響健康！」
奸商就係奸商，食水不知幾深，一個機頂盒正式價錢係千五蚊，居然賣到三千幾蚊，最貴仲賣到六千幾蚊！
呢啲人絕對唔係普通騙徒。據消委會講，部分公司嘅註冊地址同埋機頂盒嘅型號都一樣，唔排除係同一集團喺幕後操縱。消委會更首次點咗九間公司嘅名，提醒市民唔好上當。不過有乜用噃，奸商鬼死咁精，今日叫做Ａ公司，聽日叫做Ｂ公司，市民點知邊個係真，邊個係假呀。
喂，搞到咁大鑊，政府唔理㗎？都唔係完全唔理嘅，警方的而且確拉過一啲騙徒。之但係，咁樣頭痛醫頭係冇用嘅，一定要喺制度上提供保障。弊就弊在呢個政府出 晒名後知後覺，成年流流長，咁多人中咗招，但政府都懶懶閒。家陣消委會踢爆咗，商務及經濟發展局局長劉吳惠蘭先至話，當局會研究修訂《商品說明條例》，將 監管範圍擴大到服務業。依家先至研究，遲唔遲啲呀，研究得嚟蚊都瞓啦。叮！
佢仲話會研究服務業嘅銷售手法，堂堂主管工商業嘅局長，居然連本港服務業嘅銷售手法都一無所知，出咗事先至臨急抱佛腳，真係笑死人。
講真啦，靠呢班官僚嚟監管，電訊市場有乜法子唔七國咁亂呀。機頂盒事件只不過係冰山一角咋。呢，早幾日就有人踢爆，好多資訊公司濫發收費短訊呃錢，嗰班騙 徒勢兇夾狼，一條短訊就收幾十蚊。當局又係隻眼開隻眼閉，等嘈到通晒天，先至做事後諸葛亮，又係話要修例監管喎。即管聽住先，到頭嚟咪又係大隻講！
叮佢個鎯鎯，香港嘅名聲都畀呢班奸商搞臭晒，如果政府仲唔快快趣趣亡羊補牢，相信香港好快變成奸商之都啦！
