消費者教育網

「曾經有個男仔話，你哋唔好再逼我老婆去美容院，再逼佢去，我破產！」琥珀美容創辦人梁健恒（Alvin）請人拍片訪問市民對本港美容院的睇法換來如此答案，更甚的是，十之八九都覺本港美容院形象負面。他歸納行內4大不良銷售手法，包括偷龍轉鳳、偷工減料、強迫消費、騎虎難下，指行家整臭一個牌頭便金蟬脫殼，改名重施故技。每次行內有醜聞，他就很快樂。黑心？他覺得去蕪存菁，有利於他這種開業至今未改過字號的美容院。由屯門街坊生意做到目前13間分店，今年推出「至安心」美容計劃，讓客人試做後30天諗清楚先決定幫不幫襯，結果推出首月營業額跌3成，爆辭職潮，走3成員工。自討苦吃？他說，實在做好品牌。

梁健恒在2013年與友人花60萬元起家，由屯門街坊美容小店做起，「當時屯門無人專打脫毛，我就標榜屯門首間光學脫毛中心。做法好簡單，可樂做全中國，百事淨係做一條村。做好一村，呢一個點着咗，就喺屯門開分店，屯門無人唔識我哋，之後去元朗。我無金主、無注資融資，一係向前一係就無晒。我嘅經營理念叫『小步大走』，寧願快小步，一步一步，唔會大步走。一間舖做得好，唔夠位，客人多，就喺附近開多一間，啲客就好自然轉移過去，好自然又儲到一班客，如是者，慢慢擴充。」

「行業充斥好多不良銷售手法，甚至連消費者自己都唔知，其中一個係『偷工減料』，即係個客買開嘢，到佢無買，咪無做足服務，例如減少時間；第二叫『偷龍轉鳳』，用緊嗰隻產品，第二次加咗另一啲嘢落去，用緊第二啲嘢你都唔知；第三，銷售過程中，一路話畀個客聽買乜買乜，但未必真係個客需要，亦未必真係個客負擔到；第四，聽過客人喺房除晒衫，就已經被人sell，甚至喺佢個袋度攞咗張卡嚟碌。」

這些不良銷售手法猶如把整個行業攬炒，梁健恒認為，一切歸咎於大集團進入市場並作出很多不合理做法，「例如佢哋包薪人工離咗地，返工第一日咩都唔使（做）就已經保證搵月薪10萬。一個中五未畢業嘅女仔憑咩可以拎月薪10萬，憑嘅就係之後一個月你要跑數，你未嚟我已經包緊你10萬，1個員工10萬，咁100個員工呢？點保證有咁嘅生意額，以平取勝，每個客攞多啲啦，唔好畀佢走啦，困佢耐啲、傾耐啲啦，呢個就係惡性循環。」越講越火滾，「酒店有五星級酒店，美容院有無評級？無。大家都喺同一條線上面，有啲美容中心有8個名㗎，點解呀？因為有一間畀人覺得唔好，咪轉名囉。呢個模式喺過去十幾年不停出現。」

他坦言：「我旗下分店都可能會有呢啲問題，所以推出冷靜期，因為我無可能管住幾百個同事，唔會知前線閂埋房門同個客講咩嘢。我只係能夠行政上畀客人聽，你要退款就限時內退畀你。」推出24小時內退款措施後，「對客戶好，對員工未必好，好hard sell嘅美容師生存唔到。因為退款，出現辭職潮，走咗3成同事。3成離開咗，又出現另一班3成。」初期公司人手才十多人，花約3個月就補充了新血。

6年來小步走到目前13間分店，今年1月又推更冷靜的「至安心」計劃，「唔想同事hardsell」造成反效果，「新客人嚟試完我嘅嘢，要離開，畀足30日你冷靜。你覺得好先返嚟買療程，結果就有辭職潮喇，因為太harsh喇！」實施首4個月，回頭客僅一半，「一個月之間，生意少咗3成，員工少咗3成，雙重打擊。而家慢慢走返上嚟，5月先做返應該有嘅生意……舒服返啲，人手增加返，返轉頭嘅客好得意，好忠誠咁叫埋屋企人、朋友嚟幫襯。」

政府今年初展開針對美容業及健身行業為主的強制性冷靜期公眾諮詢，不少美容業界反對，擔心打爛飯碗。行得正企得正怕甚麼？身兼國際美容健康發展常務委員會副主席的梁健恒表示，業界大部分人反對強制性、一刀切，害群之馬只是小部分。如果實施強制性冷靜期，大部分美容院將面對銀行收緊現金流，「我哋美容界經營方式，會同銀行攞一個叫信用卡分期或者叫數期，即係現金擔保。譬如每月碌100萬卡，我咪要100萬現金流係銀行，但有啲可能一個月碌500萬㗎喎，唔係間間公司都準備咁多現金流。」他續指：「事實上由去年6月開始政府話佢有機會實施冷靜期，銀行已經由3個月數期增加到半年，大部份嘅美容公司都收到信。講緊100萬數變600萬……如果佢本身係集團影響細，但對小店，有95%以上係靠信用卡付款，咁我哋就非常危險啦！有啲業界嘅人直頭賣樓賣乜賣盛都係為咗希望有現金流擺喺銀行。」

梁健恒認為，業界可設立約章，需要設立冷靜期，「好似我咁做咗咁多年相安無事，退款數字不斷下降。其實冷靜期絕對杜絕唔到問題，7天冷靜期咪7天後先搞問題囉，頭先我講啦，偷龍轉鳳、偷工減料……全部可以喺7天後發生問題㗎，一刀切冷靜期完全解決唔到呢啲問題。我哋業界就做一個嘅正面嘅團隊，願意行冷靜期嘅。唔行冷靜期嘅，大家都明，你咪唔好幫襯囉。我哋業界自己做冷靜期，做好佢就得啦。」

記者：陳家雄

成為第一個人讚好

讚好

取消讚好