隔牆有耳:破解 iPhone變磚流言

Categories 管理員的話
0
http://hk.apple.nextmedia.com/template/apple/art_main.php?iss_id=20110115&sec_id=4104&art_id=14871969

(蘋果日報) 2011/1/15

如果你係 iPhone用家,最近可能都收過朋友傳嚟短訊,話如果收到號碼 2541 2811來電千祈唔好接聽,否則一接就會死機變「磚」,連蘋果電腦都救唔番,仲叫你將呢個消息通知用 iPhone親朋戚友。

墮入連鎖短訊惡作劇

死咗機所有資料化為烏有, iPhone用家唔驚就假,好自然會諗 2541 2811呢個電話號碼,究竟乜嘢來頭咁惡。只要 Google吓,就會發現呢個電話號碼多年前,曾涉及一單假扮香港郵政套取市民個人資料事件。呢個號碼既然有一段黑暗歷史,收到短訊嘅人難免又信多幾成, 因此即時將短訊轉發親友,點知咁就墮入咗連鎖短訊惡作劇。
為揭開 iPhone變磚之謎,八方身先士卒致電 2541 2811,發現訊號長響,似乎已經停用。八方再致電蘋果電腦技術支援熱線查詢,都未講完件事,職員已經用好無奈嘅語氣話:「邊有可能一接電話就死機,如果 咁嚴重官網一早通知客戶啦!」睇嚟呢個短訊確實嚇親唔少 iPhone用家,搞到 CS應接不暇煩到癲。
香港電腦保安事故協調中心經理古煒德對呢 個惡作劇短訊都略有所聞,佢話至今都冇收過 iPhone因此死機嘅報告,指事件好似以前流傳嘅連鎖電郵,其中一個主要特徵係叫接受者將訊息盡量傳開去。古煒德話呢種惡作劇會令用家以幾何級數咁傳送 短訊,耗費大量網絡資源,認真不該。

黑客可癱瘓智能手機

咁接一個電話有冇可能癱瘓智能手機呢? 港大電機電子工程學系副教授張星煒話技術上絕對做得到,但先決條件係手機已經被安裝「黑心程式」,預設接到指定來電號碼便會令手機死機。張教授話由於所有 iPhone Apps推出前都必須通過蘋果電腦審核,因此出現呢種黑心程式嘅機率微乎其微,佢又話黑客如果用死一個號碼嚟搞事,好容易俾人追查到同防備,唔相信有黑客 會咁戇居。
八方記得過去出現嘅惡作劇連鎖電郵,分別有某大型傢俬店有拐子佬,以及某茶餐廳出產「精液飯」等,被中傷嘅機構都在行內頗有名氣。 iPhone 4自去年 8月推出以來一直熱賣,原價 4,988元嘅 16GB版,行貨近日炒價突破 7,100蚊。人氣咁勁,又難怪樹大招風。

成為第一個人讚好

Leave a Reply