消費者教育網

(東方日報) 2010/8/1

八達通出售顧客個人資料圖利呢單嘢備受千夫所指，私隱專員公署已介入調查，連大股東港鐵董事局都要介入處理。有市民投訴，自從參加八達通「日日賞計劃」 後，經常收到保險同市場調查機構電話，不勝其煩。工聯會立法會議員王國興近日對事件咬住唔放，但工聯會另一位議員黃國健（ＫＫ）對呢啲電話就又愛又恨，點 解？因為佢個乖仔都係做緊類似工作囉！

ＫＫ個仔舊年先喺澳洲大學畢業，依家喺當地市場調查機構工作，不時都要隨機cold call畀唔同嘅人，自從個仔做咗呢份工之後，佢同太太收到推銷或者市場調查電話，都會諗起個仔工作有幾辛苦，即時會客氣好多，唔會鬧人或者大力cut 線。不過ＫＫ好均真，話出賣個人資料絕對要嚴懲，但對前線員工可以客氣啲，因為大家都係打份工啫！

同ＫＫ講開至知，原來香港一啲市場調查機構多採用佣金制，做到生意先分到錢，但佢話澳洲就有固定月薪，所以個仔嘅工作相對較穩定。佢又話澳洲嗰邊生活節奏冇香港咁緊張，啲外國人用成十分鐘做問卷都唔會介意；如果呢類調查改喺香港做，肯定答唔夠兩句就畀人cut線啦！

成為第一個人讚好

讚好

取消讚好